Rev 1 | KYG | STEP | Goti'a alino fala ki male'niya gemo Goti ali'ya'amo ne'aliya vaya'mo malage huno afole aisiya kava'mo alino apave lisiyafe'mo Yesu Kalaisi'mo alino ami'niye. Kalaisi'a agai'a enisole vekamo alino ate'nigeno ali'ya'amo ne'aliya vekamo Yonitegamo emine'niye.

Revelation of John 1

1 Goti'a alino fala ki male'niya gemo Goti ali'ya'amo ne'aliya vaya'mo malage huno afole aisiya kava'mo alino apave lisiyafe'mo Yesu Kalaisi'mo alino ami'niye. Kalaisi'a agai'a enisole vekamo alino ate'nigeno ali'ya'amo ne'aliya vekamo Yonitegamo emine'niye. 2 Yoni'a muki age'niya kavafe'mo avo'mo kae male'niye. Mani gemo Yesu Kalaisi'a Gotitegati alagi lama ge'amo alino ave li'niya gemo hane'niye. 3 Mani aune gemo lekana paite'a siosi vaya'aife'mo ae'a hakalo hu'a hapa nepaiya vaya'e afite'a akame nehaya vaya'e'mo Goti aulagale'mo alagepa hu'a mai'nayanage'a afa'a apamogaga aigae. Afole aisiya afina'mo ago hogo nehiya'mofe'mae.

Yoni'mo seveni'a siosifi'mo mai'naya vaya'aife'mo avo'mo kae male'niya gemae

4 Nagaemo Yoni'namo Esiya kotega hane'niya seveni'a siosifi'mo mai'naya vaya'mogitapae'mo mani avo'mo kae'nove.

Goti'a hogoteno mai'niyanageno hemeni'e'mo ne'maiyanageno henaga'amo maisiya vekamo'a fiku lapa maeno lapaminageno lapaipamo'mo falu hino. Goti Auneme'amo'mo muki lokiya himamu'amo seveni'a himamu'amo ali'niya vekamo Goti'a yagaino ne'apateya sia aulagale'mo mai'niya vekamo'a fiku lapa maeno lapaminageno lapaipamo'mo falu hino. 5 Yesu Kalaisi'a Gotife'mo lama ge ava gemo nehiya vekamo'a fali'naya vayapati'mo hogoteno alino he tino ate'niya yege mafa'ne'amo mai'niye. Agaemo ma mopafi ala kini vaya'aite'mo yagaino ne'apateya ne'apimo'a fiku lapa maeno lapaminageno lapaipamo'mo falu hino.

Agaemo lagaefe'mo hau ayamopafi'mo hau'nigeno'ae'mo hosu kavatimo kola'aleti'mo aeno kalo paeno atale'niye. 6 Agaemo afo'amo Goti ali'ya'amo alisunafe'mo yagaita apatesuna ala kini vaya'e mono huta ne'apatona vaya'e'mo alino hamaleno late'niye. Yesu Kalaisi'a ha le konali ya'a'e himamu'a'e'mo aliteno muki afina'mo maige maige huno maino. He, lama ge.

7 Afiyo, Hiyapi'mo eminesige'a muki vaya'amogimo ne'agesage'apae'mo agufafi'mo nili aige faite'a atege hu'naya vaya'mogi'e'mo agegae. Muki ma mopafi nofi vaya'mogimo ne'age'apae'mo yulagefa aigae. He, alagi lama ge, huno ani kava'mo afole aigiye. 8 Ala kava ne'mo'a, Nagaemo ali'na aepa fai male'novanage'na ali'na hano hu'na atesuva vekamo mai'nove. Hogote'na mai'ne'na hemeni'e'mo mai'novanage'na henaga'a'e'mo maiguve. Muki lokiya'age vekamo nagaemo mai'nove, huno hu'niye.

Yoni'a Kalaisi'mo age'niya gemae

9 Nagaemo Yoni'namo konagatapimo'namo mai'nove. Yesupi'mo mai'netae'mo magokepi lagafu kige Yesu'a yagaino nelateyategamo maige o'ataleta atafauta alagi huta maige huta ne'maune. Nagaemo Goti alagi lama ge'a'e Yesufe'mo ava ge'e'mo ae'na hakalo hu'na hapa pai'nova'mofe'mo ali'a nahafaitalage'na e'na Patamosi ani ago'nanenafi'mo mai'nove. 10 Ala kava ne'mo afina'mo afole ai'nige'na Goti Auneme'afi'mo mai'ne'nae'mo naune kava'mo hu'na mai'nogeno'ae'mo nakamelegati'mo alopa gefati'mo pikuli hugekana huno hu'nige'na afi'nove. 11 Ani gemo'mo, Nagaemo ali'na aepa fai'na ate'novanage'na ali'na hano hu'na atesuva vekamo mai'nove. Agesana kavafe'mo avo'mo kaetekae'mo seveni'a siosimo Efasasi siosifinagi Simena siosifinagi Pegamamu siosifinagi Taiyataila siosifinagi Satisi siosifinagi Filatefiya siosifinagi Leyotisiya siosifi'mogi hu'a mai'naya vaya'aitegamo ani avo'mo atalegeno vino, huno naha pai'niye.

12 Naha pai'nige'na nakamelegamo agesuvafe'mo ai'na afe le'na agovana seveni'a aise hi'yalamute'mo magoke magoke lamumo male'naya hi'yalamu'mo goli yafateti'mo alo hu male'naya hi'yalamu'mo hane'nige'na age'nove. 13 Mago vekamo vemo mafa'negana vekamo hi'yalamu'mo folagapi'mo mai'neno yatala kukenamo vaitalegeno aiyalega lami'nigeno goli yafateti'mo alo hu male'naya lavolavomo haifi'yale'mo vaino aliteno mai'niye. 14 Agenopamo'e ayoka'mo'e'mo yaveyave sipisipi ayokakana huno yaveyave'age hu'niye. Aulagala'mo'a ata vaikana huno le'niye. 15 Aiyala'mo'a haesa yafa'mo sitopufi kae'nageno aeno ha neleya kava huno aeno ha le'niye. Nagaemo age'amo afuvana alopa ani ha'yamo'mo age aigekana huno age ai'niye. 16 Agaemo lamaga ayapi'mo seveni'a kanefi'mo ali'nigeno avayafati'mo aluga aluga'amo ave ne'neya naipemo emine'niye. Augosafati'mo yegemo'mo haineno lamotule'mo ae'niya afina'mo neleya kava huno le'nige'na age'nove.

17 Agete'nae'mo fali'nova vekagana hu'na aiyafi'mo nago'ya fai'na asagau'na ai'na mai'nogeno'ae'mo lamaga ayateti'mo nagufale'mo male'neno'ae'mo, Koli osuvo. Hogote vekamo mai'ne'nae'mo henaga vekamo mai'nove. 18 Afa'a ne'mauva vekamo mai'nove. Afiyo, huno, fali'novanage'na maige maige hu'na mai'na hano osu'na afa'a maiguve. He, lama ge. Nagaemo kitamo yaki'na apatesuva ki'mo ali'nova'mofe'mo falisayafe'mofi afa'a maisayafe'mofi hu'na muki vaya'aite'mo yagai'na ne'apatove. 19 Kagaemo age'nana kavafenagi hemenimo hane'niya kavafenagi henaga'amo afole aisiya kavafe'mogi huka avo'mo kao. 20 Seveni'a kanefi'mo lamaga nayapi'mo hane'nigeka age'nana kanefi'e seveni'a goli yafateti'mo alo hu'naya hi'yalamu'efe'mo aepa'amo hane'niyana alino fala ki male'niya kavafe'mo aepa'amo kaha paiguve. Seveni'a kanefi'mo hane'niya kava hu'a seveni'a siosifi'mo apa vaya'amo mai'nae. Seveni'a aise hi'yalamute'mo magoke magoke lamumo male'naya hi'yalamu'mo hane'niya kava huno seveni'a siosi'amo hane'niye.